Le Prénçot XV
Le Prénçot XV




La sisiaeme pllanéte étét ine pllanéte dis fés mae éspaciouse. O yi rechtét in vieù mossieù qui grafounét daus énourmes livres.

« Téns ! Velat in éspllorour ! » que le s’ébrallit, quoure que l’avisit le prénçot.

Le prénçot se sitit su la tablle é bufit in petit. L’avét déjha tant véyajhai !

« De voure que te véns ? li disit le vieù mossieù.

Qu’ét-o qu’ol ét quou grous livre ? disit le prénçot. Quàe que ve faséz çhi?

I seù jhiografe, disit le vieù mossieù.

Qu’ét-o qu’ in jhiografe ?

Ol ét in savent qui couneù voure que sant lés maers, lés rivéres, lés viles, lés muntanes é lés désarts.

Çheù ol ét bén éntéraessant, disit le prénçot. A la fin çheù ol ét in vrae métàe ! » Pi le boulitit alentour de li su la pllanéte dau jhiografe. L’avét jhamae core véyu ine pllanéte si majhéstouse.

« Al ét bén béle, voutre pllanéte. Ol at-o daus ocians? I pe poet z-ou savér, disit le jhiografe.

Ah ! (Le prénçot étét acadrouai.) Pi daus muntanes ?

I pe poet z-ou savér, disit le jhiografe.

Pi daus viles é daus rivéres é daus désarts ?

I pe poet z-ou savér nun pu, disit le jhiografe.

Mé v’étéz jhiografe !

Ol ét recta, disit le jhiografe, mé i seù poet in éspllorour. I écorte réde d’éspllorours. Ol ét poet le jhiografe qui vat faere le cuntajhe daus viles, daus rivéres, daus muntanes, daus maers, daus ocians é daus désarts. Le jhiografe ét trot cunséquent pr vesicàe. Le çhite jhamae sun burea. Mé le recét lés éspllorours. Le lés quéscioune, pi le prent en note lours remenbrances. Pi si lés remembrances d’in d’entr zàus li paraessant éntéraessantes, le jhiografe fét faere ine ençhéte su la moraletai de l’éspllorour.

Prquàe dun ?

Pelamor qu’in éspllorour qui mentirét causerét daus avrdàies den lés livres de jhiografie. Pi in éspllorour qui berét trot étou.

Prquàe dun ? fasit le prénçot.

Pelamor que lés arsoulls veyant doblle. Aloure le jhiografe marquerét deùs muntanes, voure qu’ol en at qu’ine.

I couneù quauquin, disit le prénçot, qui serét in mouvas éspllorour.

Ol ét poussiblle. Dun, quoure que la moraletai de l’éspllorour paraet boune, i fasun ine ençhéte su sa décache.

Quauquin vat vére ?

Nun. Ol ét trot enbrlificotai. Mé i menaçun su l’éspllorour pr que l’abolle daus proues. S’ol ét quésciun pr éxenplle de la décache d’ine grousse muntane, i menaçun su li pr que l’en ramene de grousses piares. »

D’in randun le jhiografe s’émovit.

« Mé tàe, te véns de lén ! T’és in éspllorour ! Te vas me dépéntràe ta pllanéte ! »

Pi le jhiografe, ayant duvért sun rejhistre, apoéntusit sun créun. Lés lais daus éspllorours se marcant d’abord au créun. O fàut ateni, pr marcàe a l’encre, que l’éspllorour éjhe abollai daus proues.

« Aloure ? quésciounit le jhiografe.

Oh ! Che màe, disit le prénçot, ol ét poet réde éntéraessant, ol ét tot petit. I ae tràes voulcans. Deùs comants, pi in voulcan tuai. Mé o sét jhamae.

O sét jhamae, disit le jhiografe.

I ae ine fllour étou.

I marcun poet lés fllours, disit le jhiografe.

Prquàe dun ! Ol ét le mae jheli !

Pelamor que lés fllours sant éféméres.

Qu’ét-o qu’o vet dire : « éfémére » ?

Lés jhiografies, disit le jhiografe, sant lés livres lés mae sérious de tots lés livres. A passant jhamae de mode. Ol ét réde rale qu’ine muntane chanjhe d’endrét. Ol ét réde rale qu’in ocian s’açhuche de soun aeve. I grafounun daus chouses étrnales.

Mé lés voulcans tuais pevant s’évellàe, décopit le prénçot. Qu’ét-o qu’o veùt dire « éfémére » ?

Que lés voulcans séjhant tuais ou évellais, o revént au ménme pr nousàutres, disit le jhiografe. Çheù qui cunte pr nousàutres, ol ét la muntane. A chanjhe poet.

Mé qu’ét-o qu’o vaut dire « éfémére » ? repétit le prénçot qui, de tote sa vie, avét poet renunçu a ine quésciun, ine fés que le l’avét demandàie.

O vaut dire « qui risque fort de basi béntout. »

Ma fllour risque fort de basi béntout ?

Bén sur. »

« Ma fllour ét éfémére, se disit le prénçot, pi al at que quatre picots pr se défendre a cuntre le munde ! Pi i l’ae laechàie tote souléte che màe ! »

O sit lae sun prmàe movement de regrét. Mé le reprenghit ac courajhe :

« Qui que ve me cunselléz d’alàe vesitàe ? que le demandit.

La pllanéte Tiare, li répounit le jhiografe. Al at ine boune renoumai… »

É le prénçot s’en anghit, sunjhant den sa fllour.




chapitre précédent           chapitre suivant



sommaire








Projet Babel